Naxçıvandan Şuşaya gedən uğurlu yol | Türk Dövlətləri Təşkilatı nə qazandı?

2009-cu il oktyabrın 3-də Naxçıvan Müqaviləsi ilə Türk Dövlətləri – Azərbaycan, Türkiyə, Qazaxıstan və Qırğızıstan bir təşkilatda birləşdilər. Daha sonra Özbəkistan Türk Dövlətləri Təşkilatına qoşuldu.

Hazırda Türkmənistan, Şimali Kipr Türk Cümhuriyyəti, Macarıstan müşahidəçi üzv olaraq təşkilatla əməkdaşlıq edir.

Bu il təşkilatın 15 yaşı oldu. Qırğızıstanda keçirilən Türk Dövlətləri Təşkilatı liderlərinin 11-ci Zirvə görüşü ölkələrin geniş əməkdaşlığı üçün irəliyə atılmış daha bir addımdır.

Qeyd edək ki, bu ilin iyun ayında Şuşada imzalanan bəyannamə ilə türk dövlətləri arasında əməkdaşlığın genişləndirlməsi iqtisadi sferada da geniş imkanlar açır. Bu dövlətlərdə ümumidaxili məhsulun həcmi 1,5 trilyon dollar, ticarət dövriyyəsi isə 1,2 trilyon dollar təşkil edir. Ümumilikdə dünya ərazisinin 1 faizi, ticarət dövriyyəsinin isə 2,4 faizi Türk Dövlətləri Təşkilatına üzv ölkələrin payına düşür.

Nəhayət, Azərbaycanın COP29-a ev sahibliyi etməsi Türk Dövlətləri Təşkilatının beynəlxalq nüfuzuna təsir edir. Türk Dövlətləri Təşkilatı ilə yanaşı, bu qurumla əlaqəli orqanlar – TÜRKSOY, TÜRKPA, Türk Akademiyası, Türk Mədəniyyəti və İrsi Fondu, Türk Biznes Şurası təsis edilib.