Neft Emalı Zavodundakı yanğınla bağlı müşavirə keçirildi

Baş nazir Əli Əsədov yanğın baş verən Neft Emalı Zavodunda əməliyyat müşavirəsi keçirib.

Nazirlər Kabinetinin məlumatına görə, Əli Əsədov martın 5-də Neft Emalı Zavodunda baş verən yanğının səbəblərini yerində araşdırmaq üçün hadisə yerinə gedib, bilavasitə yanğının söndürülməsi prosesini müşahidə edib.

Müşavirədə fövqəladə hallar naziri, nazirliyin aidiyyəti strukturlarının rəhbərləri, SOCAR-ın prezidenti və digər rəhbər şəxslər iştirak ediblər.

Fövqəladə hallar naziri Kəmaləddin Heydərov, SOCAR-ın prezidenti Rövşən Nəcəf və digər məsul şəxslər yanğının səbəblərinin araşdırılması və dəyən ziyanın hesablanmasına dair məruzə ediblər.

Baş nazir səbəblərin araşdırılması və belə halların qarşısının alınması istiqamətində qəti tədbirlərin görülməsi haqda tapşırıqlar verib.