Ombudsman Azərbaycandakı erməniəsilli məhkumlarla bağlı ittihamlara necə reaksiya verdi? - Baku TV

Ombudsman Aparatı Ermənistanda keçirilən mətbuat konfransında Azərbaycandakı erməniəsilli məhkumlarla bağlı səsləndirilən fikirlərə münasibət bildirib. Azərbaycanın İnsan Hüquqları üzrə Müvəkkili Səbinə Əliyeva həmin şəxslərin dini mənsubiyyətinə görə ayrı-seçkiliyə və işgəncəyə məruz qalması, xristian dini simvollarının məhv edilməsi və dini ayinlərlə bağlı səsləndirilən iddiaları əsassız və qərəzli hesab edib.

Səbinə Əliyeva qeyd edib ki, heç bir etibarlı sübut təqdim edilmədən ağır ittihamların fakt kimi ictimaiyyətə çatdırılması insan hüquqlarının müdafiəsi prinsiplərinə uyğun deyil. Ombudsman ayrı-ayrı şəxslərin məsələlərinin dini və etnik qarşıdurma müstəvisinə keçirilməsinin yolverilməz olduğunu vurğulayıb. Bildirilib ki, cinayət məsuliyyəti şəxsin etnik və ya dini mənsubiyyətinə deyil, törədilən əməlin xarakterinə, toplanmış sübutlara və məhkəmənin hüquqi qiymətləndirməsinə əsaslanır.

Ombudsmanın Milli Preventiv Qrupunun müxtəlif vaxtlarda keçirdiyi monitorinqlər zamanı Azərbaycanda saxlanılan erməniəsilli şəxslərlə konfidensial görüşlər keçirildiyi, onların tibbi və psixoloji vəziyyətlərinin qiymətləndirildiyi açıqlanıb. Monitorinqlərin nəticələrinə əsasən, həmin şəxslərin hüquq və azadlıqlarının beynəlxalq standartlara uyğun təmin edildiyi, ayrı-seçkiliyə yol verilmədiyi, tibbi yardım və digər zəruri xidmətlərə çıxışlarının olduğu bildirilib.

Ombudsman həmçinin yoxlanılmamış məlumatlar əsasında “işgəncə”, “dini təqib” və ayrı-seçkilik kimi ağır ifadələrin işlədilməsinin ictimai rəyi yanıltmağa və cəmiyyətlər arasında qarşıdurma yaratmağa xidmət edə biləcəyini qeyd edib. Səbinə Əliyeva belə açıqlamaların Azərbaycan və Ermənistan arasında davam edən sülh prosesi fonunda xüsusilə narahatedici olduğunu vurğulayıb. Onun sözlərinə görə, davamlı sülh üçün yalnız siyasi və hüquqi razılaşmalar deyil, qarşılıqlı etimadın gücləndirilməsi və nifrət ritorikasından uzaq durulması da vacibdir.