"Predator Hawk"un gücü nədir? - Azərbaycanın hərbi paradda verdiyi mesaj | QARABAĞ XRONİKASI

Baku TV-nin “Qarabağ xronikası” verilişində bu dəfə “Predator Hawk” raket kompleksinin Azərbaycan üçün yaratdığı strateji üstünlüklər və onun regional təhlükəsizlik balansına təsirindən bəhs olunub.

Bildirilib ki, təxminən 5 metr uzunluğunda olan bu raket 140 kiloqramlıq döyüş başlığına malikdir və 50-300 kilometr məsafədəki hədəfləri yüksək dəqiqliklə vurur.

Qeyd olunub ki, GPS, GLONASS və INS naviqasiya sistemləri ilə idarə olunan “Predator Hawk” düşmən dərinliyində yerləşən komanda məntəqələrinin və kritik infrastrukturun cərrahi dəqiqliklə məhv edilməsinə imkan yaradır.

Diqqətə çatdırılıb ki, raketin 300 kilometrlik əməliyyat radiusu Ermənistan ərazisindəki bütün əsas hərbi obyektləri potensial hədəf kimi nəzərdə tutmağa şərait yaradır.

Sistem həmçinin İranın şimal-qərbində yerləşən mühüm aviasiya bazalarını, raket obyektlərini və SEPAH-a məxsus strateji infrastrukturu da əhatə edə bilir.

Vurğulanıb ki, “Predator Hawk” kompleksi Azərbaycanın müdafiə doktrinasında operativ imkanları genişləndirən və regional təhlükəsizlik mühitində strateji çəkindirmə yaradan mühüm vasitədir.

Bu sistemin mövcudluğu ölkəmizə müharibə aparmaq üçün deyil, müharibənin qarşısını almaq və bölgədə uzunmüddətli sülhə töhfə vermək üçün güc nümayiş etdirmək imkanı verir.