Prezident İlham Əliyev Xalq artisti Şəfiqə Məmmədovanı qəbul etdi

Prezident İlham Əliyev martın 29-da Xalq artisti Şəfiqə Məmmədovanı qəbul edib, ona “İstiqlal” ordenini təqdim edib.

Dövlət başçısı Xalq artistini qarşıdan gələn yubileyi münasibətilə təbrik edib, ona yeni uğurlar arzulayıb.

“Siz uzun illər ərzində Azərbaycan mədəniyyətinin inkişafında çox önəmli rol oynayırsınız, ölkəmizin teatr və kino sənətinə dəyərli töhfələr vermisiniz. Həm gözəl aktrisa, həm pedaqoq, ictimai xadim kimi xalqımızın hörmət və rəğbətini qazanmısınız. Ulu Öndər Heydər Əliyev sizin fəaliyyətinizi həmişə yüksək qiymətləndirirdi, siz bunu yaxşı bilirsiniz.

Hələ sovet dövründə siz həm Azərbaycan Respublikasının, həm Sovet İttifaqının dövlət mükafatlarına layiq görülmüsünüz. Müstəqillik illərində, 2000-ci ildə Ulu Öndərin Sərəncamı ilə siz “Şöhrət” ordeni ilə təltif olunmusunuz. Ondan sonra da Azərbaycan dövləti sizin fəaliyyətinizi həmişə yüksək qiymətləndirərək sizi ali mükafatlarla təltif etmişdir. Mənim Sərəncamımla siz "Şərəf", Birinci dərəcəli "Əmək" ordenləri, Fəxri diplomla təltif olunmusunuz. Bu gün imzaladığım Sərəncam əsasında “İstiqlal” ordeni ilə təltif edilirsiniz”, − deyə Prezident İlham Əliyev Şəfiqə Məmmədovanı qəbul edərkən deyib.

Dövlət başçısına dərindən təşəkkür edən Xalq artisti Şəfiqə Məmmədova bu günün həyatının ən xoşbəxt, ən mənalı və nəticəli günlərindən biri olduğunu deyib.

“Hörmətli cənab Prezident, bu gün Siz mənə elə bir zirvəni, elə bir qüruru bəxş etmisiniz ki, mən ömrümün axırına kimi Sizə minnətdar olacağam”, − deyə Xalq artisti bildirib.