Prezident mühüm sərəncam imzaladı

Azərbaycanda nəqliyyatın ayrı-ayrı növlərinin koordinasiyalı fəaliyyətinin və əhalinin mobilliyinin təmin edilməsi, yol və nəqliyyat infrastrukturunun inkişaf etdirilməsi, yol hərəkətinin təşkili, təhlükəsizliyi və tənzimlənməsi sahələrində fəaliyyətin əlaqələndirilməsi və təkmilləşdirilməsi məqsədilə Nəqliyyatı Əlaqələndirmə Şurası yaradılır.

Bununla bağlı Prezident İlham Əliyev sərəncam imzalayıb. Sənədə əsasən Şuraya sədrliyi rəqəmsal inkişaf və nəqliyyat naziri edəcək.

Nazirlər Kabineti Aparatının Nəqliyyat, kommunikasiya və innovasiya şöbəsinin müdiri, daxili işlər nazirinin müavini, ekologiya və təbii sərvətlər nazirinin müavini, Dövlət Şəhərsalma və Arxitektura Komitəsi sədrinin müavini, Bakı Şəhər İcra Hakimiyyəti başçısının müavini, Avtomobil Yolları Dövlət Agentliyi İdarə Heyəti sədrinin müavini, Yerüstü Nəqliyyat Agentliyi İdarə Heyətinin sədri, “Azərbaycan Dəmir Yolları” və “Bakı Metropoliteni” Qapalı Səhmdar Cəmiyyətlərinin sədrləri isə Şuranın müavinləri olaraq müəyyənləşib.

Nazirlər Kabineti bir ay müddətində Şuranın Əsasnamə layihəsi ilə bağlı təkliflərini, Şuranın yaradılması ilə bağlı nəqliyyat sahəsində tənzimləmənin təkmilləşdirilməsi ilə əlaqədar normativ hüquqi aktların layihələrini hazırlayıb Prezidentə təqdim etməli, sərəncamdan irəli gələn digər məsələləri həll etməlidir.