Qarabağdan Dumlupınara: 2 ölkənin tarixində iz qoyan azərbaycanlı zabit kim idi? - QARABAĞ XRONİKASI

“Qarabağ xronikası” verilişinin yeni buraxılışında Azərbaycan və Türkiyə hərb tarixində iz qoymuş zabitlərdən biri – əslən Qarabağdan olan artilleriya komandiri Aslan Hacızadənin hərbi fəaliyyəti geniş təhlil olunub.

Verilişdə bildirilib ki, XIX əsrin sonu – XX əsrin əvvəlləri hərbi-siyasi qarşıdurmalarla zəngin dövr olub və bu mərhələdə formalaşan zabitlər regionun taleyində mühüm rol oynayıblar. 1897-ci ildə Tərtərdə anadan olan Aslan Hacızadə 1917-ci ildən etibarən hərbi xidmətə başlayıb, 1918-ci ildə Gəncədə topçu ixtisası üzrə təhsil alıb və qısa müddətdə peşəkar artilleriyaçı kimi tanınıb.

Qeyd edilib ki, onun Azərbaycan Xalq Cümhuriyyəti Ordusunda xidmətinin ən mühüm mərhələsi Qarabağ cəbhəsi olub. Əsgəran xətti uğrunda gedən döyüşlərdə A.Hacızadənin artilleriya batareyası düşmən müdafiəsinin yarılmasında həlledici rol oynayıb və nəticədə, Şuşanın nəzarətə götürülməsinə mühüm töhfə verib.

Vurğulanıb ki, 1920-ci ilin aprel işğalından sonra o, digər cümhuriyyət zabitləri kimi mübarizəni davam etdirərək Türkiyəyə keçib və Kazım Qarabəkir Paşanın komandanlığı altında Şərq Cəbhəsində xidmətə başlayıb. Sarıqamış, Qars, Gümrü və İğdır əməliyyatlarında iştirak edərək türk ordusunun qələbələrində əhəmiyyətli rol oynayıb.

Bildirilib ki, Aslan Hacızadənin hərbi bioqrafiyasında ən mühüm məqamlardan biri 1922-ci ildə keçirilən Böyük Hücum və Dumlupınar döyüşlərində iştirakı olub. Bu döyüşlərdə artilleriya bölməsinin koordinasiyası və atəş dəstəyinin təmin edilməsi sahəsində peşəkarlıq göstərərək Türkiyə İstiqlaliyyət müharibəsinin qələbə ilə başa çatmasına öz töhfəsini verib.

Sonrakı illərdə o, Türkiyə Ordusunda peşəkar hərbçi kimi xidmətini davam etdirib, müxtəlif üsyanların yatırılması əməliyyatlarında iştirak edib, polkovnik rütbəsinə qədər yüksəlib və 1955-ci ildə ehtiyata buraxılıb.

Yekunda qeyd edilib ki, Aslan Hacızadənin hərbi irsi iki qardaş ölkənin ortaq yaddaşının bir hissəsidir. Onun fəaliyyəti göstərir ki, tarixin taleyini dəyişən əsas amillər peşəkarlıq, sədaqət və düzgün hərbi qərarlardır. Belə zabitlərin həyatı və xidməti yeni nəsil hərbçilər üçün örnək olaraq yaşadılmalıdır.