"Rossiya 24"də Bakıda Fransanın müstəmləkəçiliyinə qarşı tədbirdən videosüjet yayımlanıb

Rusiyanın “Rossiya 24” telekanalı Fransanın müstəmləkə siyasətinə qarşı Bakıda təşkil edilən “Neokolonializm: İnsan haqlarının pozulması və ədalətsizlik” mövzusunda beynəlxalq konfransla bağlı videosüjet təqdim edib.

Prezidentin köməkçisi Hikmət Hacıyevin Prezident İlham Əliyevin adından tədbir iştirakçılarına müraciətdə səsləndirdiyi “Fransa müxtəlif regionlarda geosiyasi intriqalar yaratmaqla məşğuldur” sözlərinə xüsusi diqqət yetirildiyi süjetdə bildirilib ki, Fransa ötən əsrdə Polineziyada 200-ə yaxın, Əlcəzairdə isə yüzlərlə nüvə sınağı həyata keçirib.

Qeyd olunub ki, Fransanın bu torpaqlara səpdiyi minalara görə Əlcəzair sakinləri hələ də əziyyət çəkir.

“Bəşəriyyətin müstəmləkə tarixində qanlı cinayətlərin əksəriyyətini Fransa törədib. O, Afrikada, Cənub-Şərqi Asiyada, Sakit okeanda onlarla ölkəni işğal edib. Latın Amerikası bölgəsinin sərvətlərini talan edərək, xalqlarını uzun illər əsarət altında saxlayan Fransa bu ərazilərdə çoxsaylı hərbi cinayətlər törədib”, – deyə reportajda vurğulanıb.