"Xarici ölkələrdən də maraq var" | Azərbaycan Kibertəhlükəsizlik Mərkəzində əlamətdar gün - Baku TV

Rəqəmsal İnkişaf və Nəqliyyat Nazirliyi, İnnovasiya və Rəqəmsal İnkişaf Agentliyinin İsrailin “Technion” Texnologiya İnstitutu ilə birgə təsis etdiyi Azərbaycan Kibertəhlükəsizlik Mərkəzinin sayca altıncı “Məzun Günü” baş tutub. Daha 100 nəfər məzun olub.

Tədbirdə iştirak edən İsrailin Azərbaycandakı səfiri Ronen Krausz bildirib ki, Azərbaycan və İsrail arasında bu birgə təşəbbüs kibertəhlükəsizliyin yalnız texniki sahə olmadığı barədə ortaq bir anlayışı əks etdirir:

“Bu, milli təhlükəsizlik, iqtisadiyyatın dayanıqlığı və texnoloji artım üçün strateji sütundur. Yüzlərlə mütəxəssis yetişdirmək və onları dövlət və özəl sektorlarda əsas vəzifələrə yerləşdirmək mərkəz üçün əlamətdar nailiyyətdir. Bu, Azərbaycanın təkcə infrastruktur deyil, həm də ən yüksək səviyyədə insan kapitalı qurduğunu göstərir. Altıncı qrupun məzunları, bu gün sizin gününüzdür!”.

Qeyd edək ki, indiyədək Azərbaycan Kibertəhlükəsizlik Mərkəzindən 480 nəfər məzun olub. Məzunlar həm dövlət qurumları, həm də qabaqcıl yerli və beynəlxalq şirkətlərdə fəaliyyət göstərirlər. Hazırda 7-ci tədris dalğası üzrə 60 tələbə təhsilini davam etdirir.