“Raket hücumları altında xidmət edirik” | Ukraynada yaşayan azərbaycanlı məmurlar danışdı

Ukraynanın strateji postlarında yer alan azərbaycanlıların sayı artıb.

Əslən İmişlidən olan Sadıqov Samir Əhəd oğlu da onlardan biridir. Samir Latviyada doğulsa da, Ukraynada böyüyüb. Həmyerlimiz hazırda Kiyevin mərkəzi Şevçenko rayonunun prokurorudur.

O, müharibə başlayandan bəri Kiyev şəhərində dəhşətli raket hücumları altında xidməti vəzifəsini yerinə yetirməyə davam etdiyini bildirir:

“Prokurorluq olaraq işimiz ağırlaşıb. Biz prokuror kimi raketlərin düşdüyü yerlərə gedirik. Bütün bunlar müvafiq protokollarda qeyd olunur və məlumatlar vahid məhkəməyə qədər istintaq reyestrinə daxil edilir”.

Şamil Fərəcov isə əslən Naxçıvandandır, Kiyevdə doğulub. Kiyev meriyasında çalışır. Eyni zamanda o, “Azadlıq” partiyasının idarə heyətində təmsil olunur.

“Partiyada yeganə azərbaycanlı mənəm. İndi Kiyev şəhərinin ərazi nəzarəti departamentində abadlaşdırma nəzarəti müfəttişliyi idarəsinin rəis müavini vəzifəsində işləyirəm. Hazırda bildiyim qədər 200 gənc azərbaycanlı Ukraynada müxtəlif dövlət qurumlarında çalışır. Onlardan 10-15 nəfər rəhbər vəzifələrdədir. Mən isə gələcəkdə Ukrayna Prezidenti olmaq istəyirəm”, – deyə o, Baku TV-yə açıqlamasında deyib.