Rusiya aviaşirkəti Azərbaycana reysləri niyə ləğv etdi?

Rusiyanın “Azimut” aviaşirkəti Mineralnıye Vodı və Soçidən Azərbaycana uçuşları ləğv edib.

Rusiya mediasının məlumatına görə, bu barədə aviaşirkətin mətbuat xidmətindən bildirilib.

Məlumata görə, “Azimut” Mineralnıye Vodıdan Bakı və Gəncəyə, həmçinin Soçidən Bakıya reyslərini dayandırıb. Buna səbəb kimi Azərbaycan Dövlət Mülki Aviasiya Agentliyinin uçuş icazəsini ləğv etməsi göstərilir.

Xatırladaq ki, AZAL-a məxsus Bakı-Qroznı aviareysini həyata keçirən sərnişin təyyarəsi dekabrın 25-də Qazaxıstanın Aktau şəhəri yaxınlığında qəzaya uğrayıb. Təyyarənin göyərtəsindəki 67 nəfərdən 42-si Azərbaycan, 16-sı Rusiya, 6-sı Qazaxıstan, 3-ü isə Qırğızıstan vətəndaşı olub. Onlardan 38-i həlak olub, 29-u sağ qalıb.

Qeyd edək ki, Bir neçə xarici aviaşirkət də baş vermiş qəzanın araşdırılması fonunda Rusiyaya uçuşlarını dayandırıb. Bunların arasında Qazaxıstanın “Qazaq Air”, İsrailin “El Al”, Birləşmiş Ərəb Əmirliklərinin “Flydubai” şirkətləri var.