Rusiya ilə Estoniya bir-birlərinin səfirlərini ölkədən qovur

Estoniya səfirindən fevralın 7-dək Rusiya Federasiyasının ərazisini tərk etmək tələb olunub.

Bu barədə Rusiya Xarici İşlər Nazirliyi məlumat yayıb. Bildirilib ki, səfir Marqus Laydre Rusiya Xarici İşlər Nazirliyinə çağırılıb və ona Estoniya hakimiyyətinin hərəkətləri ilə bağlı sərt etiraz notası təqdim edilib.

Söhbət Tallindəki Rusiya səfirliyinin əməkdaşlarının ixtisarından gedir. Rəsmi Moskva ikitərəfli münasibətlərin belə inkişafı ilə bağlı məsuliyyətin tamamilə Estoniya tərəfinin üzərinə düşdüyünü qeyd edib. Səfirə deyilib ki, Rusiya Federasiyası bundan sonra da Estoniya rəhbərliyinin düşməncəsinə addımlarına cavab verməyə davam edəcək.

Qeyd edək ki, Estoniyanın Rusiyaya cavabı özünü çox gözlətməyib. Estoniya XİN-dən bildirilib ki, Rusiyanın bu ölkədəki səfiri Vladimir Lipayev Estoniya səfirinin Moskvadan ayrılması ilə eyni vaxtda Tallini tərk etməlidir.