Rusiyadan Azərbaycana hansı reyslər təxirə salındı? | Sərnişinlərin diqqətinə

Rusiyanın bəzi aviaşirkətləri Ufa, Samara, Vladiqafqaz, Saratov, Nijni Novqorod və Soçidən Azərbaycana reysləri ləğv edib.

Bu barədə Rusiya mətbuatı məlumat yayıb.

Bildirilib ki, "UTair" Ufa və Samaradan Bakıya uçuşları ləğv edib. Sərnişinlər artıq SMS vasitəsilə ləğv barədə bildirişlər almağa başlayıblar. Eyni zamanda "UTair"in Moskva, Sankt-Peterburq, Tümen və Surqutdan Bakıya reysləri təxirə salınıb.

Bununla yanaşı, "IrAero" Vladiqafqaz, Saratov və Nijni Novqoroddan Bakıya reysləri cədvəldən çıxarıb. Bu reyslərə biletlər bronlaşdırma sistemindən tamamilə silinib. "Ural Airlines" Soçidən uçuş proqramında dəyişiklik edib.

Qeyd edək ki, Azərbaycandan Rusiyanın 10 şəhərinə – Qroznı, Mahaçqala, Mineralnıye Vodı, Soçi, Volqoqrad, Ufa, Samara, Nijni Novqorod, Vladiqafqaz və Saratova uçuşlar dayandırılıb. Məlumatda bildirilib ki, uçuşların ləğvi və ya təxirə salınması sərnişinlərin təhlükəsizliyi ilə bağlıdır.