Rusiyadan Azərbaycana qarşı hərbi əməliyyat gözlənilir?

3 il yarımdır Ukrayna bataqlığından çıxa bilməyən Rusiya indi də əlinin altında saxladığı media resursları ilə Azərbaycanı “hərbi əməliyyat”la hədələyir.

Rusiya hakimiyyətinə yaxınlığı ilə seçilən “Kremlyovskaya Tabakerka” “Telegram” kanalı Azərbaycana qarşı xüsusi hərbi əməliyyat barədə müzakirələr getdiyi iddiasını yayıb.

“Azərbaycanda xüsusi hərbi əməliyyat, bəlkə də, bir az da yaxınlaşıb. Amma bu o demək deyil ki, mütləq baş verəcək. Hazırda müzakirələr gedir”, – kanal Kremldəki mənbələrə istinadla bildirib.

Kanal hətta Rusiya Müdafiə Nazirliyindəki mənbəyə istinadla hərbi əməliyyatın detallarını da açıqlayıb.

“Uzaqmənzilli silahlarımızdan istifadə edəcəyimiz aydındır. Xüsusilə raketlər və PUA-lar mütləq Bakıya doğru uçacaq. Ordumuz düşmən dövlətinin ərazisinin bir neçə rayonunu da nəzarətə götürə bilər. Hansı rayonlar olduğu sirdir. Amma Azərbaycan qoşunlarının uzun müddət müqavimət göstərə biləcəyini düşünmürəm”, – mənbə deyib.

O qeyd edib ki, Azərbaycanda xüsusi hərbi əməliyyatla bağlı qərar hələlik verilməyib.