Sədərək rayonuna təyin edilən icra başçısı kimdir?

Prezident İlham Əliyevin Sərəncamı ilə Naim Etibar oğlu Cahidzadə Naxçıvan Muxtar Respublikası Sədərək Rayon İcra Hakimiyyətinin başçısı təyin edilib.

O, 1989-cu il avqustun 18-də Şahbuz rayon Kolanı kəndində anadan olub. 2006-2010-cu illərdə Naxçıvan Dövlət Universitetinin İqtisad fakültəsində “Maliyyə və kredit” ixtisası üzrə bakalavr, 2011-2014-cü illərdə eyni ixtisas üzrə magistratura təhsili alıb.

Əmək fəaliyyətinə isə 2011-ci ildə Naxçıvan Dövlət Universitetinin İqtisad fakültəsində tütor vəzifəsində başlayıb. 2014-cü ildən Universitetin İdarəetmə fakültəsində dekan müavini, 2018-ci ildən isə dekan vəzifəsində çalışıb. 2016-cı ildən AMEA-nın Naxçıvan bölməsinin dissertantıdır.

Naim Cahidzadə 2018-ci ildə Rumıniyanın Piteşti Universitetində “Müasir büdcə sistemləri və müasir maliyyə sistemləri”, “Azərbaycan və dünya təcrübəsinin fərqləri” mövzularında mühazirələr oxuyub. Həmçinin bir neçə fənn proqramı və məqalənin müəllifidir. O bu təyinatadək Naxçıvan Muxtar Respublikası Ali Məclisi Aparatının İqtisadiyyat şöbəsinin müdiri vəzifəsində çalışıb.