SOCAR-ın nümayəndə heyəti Naxçıvana səfər edib

Heydər Əliyev İli çərçivəsində Dövlət Neft Şirkəti tərəfindən silsilə tədbirlər həyata keçirilir.

Oktyabrın 17-də Naxçıvanda “Heydər Əliyev və Azərbaycanın yeni neft strategiyası” mövzusunda konfrans təşkil olunub.

SOCAR-ın nümayəndə heyəti ümummilli lider Heydər Əliyevin Naxçıvan şəhərinin mərkəzində ucaldılan abidəsini ziyarət edib, önünə gül dəstələri düzüb.

Heydər Əliyev Muzeyini ziyarət edən tədbir iştirakçıları ümummilli liderin həyat və fəaliyyətinə dair fotoşəkil və eksponatlarla tanış olublar.

SOCAR tərəfindən muzeyə ulu öndərin neft-qaz sənayesindəki əvəzsiz xidmətlərindən bəhs edən fotoşəkillər əsasında hazırlanmış markalar hədiyyə olunub.

Daha sonra SOCAR nümayəndə heyəti Naxçıvanda Prezidentin səlahiyyətli nümayəndəsi Fuad Nəcəfli ilə görüşüb. Görüşdə “Heydər Əliyev İli” çərçivəsində SOCAR tərəfindən təşkil olunan tədbirlər, təhsil sahəsində görülən işlər barədə məlumat verilib, sahə üzrə yeni təşəbbüslər müzakirə edilib.

SOCAR-la Naxçıvan Dövlət Universitetinin rəhbər heyəti arasında keçirilən görüşdə ulu öndərin Azərbaycanda elm və təhsilin inkişafı sahəsində apardığı məqsədyönlü siyasətdən bəhs olunub.

Heydər Əliyev İli çərçivəsində ölkəmizin ali təhsil müəssisələri arasında əməkdaşlıq əlaqələrinin genişləndirilməsinin əhəmiyyəti qeyd olunub. SOCAR-ın Bakı Ali Neft Məktəbi ilə Naxçıvan Dövlət Universiteti arasında Anlaşma Memorandumu imzalanıb.

Daha sonra nümayəndə heyəti Naxçıvan Dövlət Milli Dram Teatrında ulu öndər Heydər Əliyevin 100 illik yubileyi münasibətilə təşkil olunan sərgi, konfrans və konsert proqramında iştirak edib. Ulu öndər Heydər Əliyevin Naxçıvan Dövlət Universitetinə səfərlərini əks etdirən videoçarx nümayiş olunub.

Sonda Naxçıvan Dövlət Universitetinin Konservatoriyasının Kamera Orkestrinin ifasında konsert proqramı təqdim olunub.