Son dəqiqə: Ramiz Mehdiyevin qızı ilə bağlı qərar verildi - Baku TV

Prezident Administrasiyasının sabiq rəhbəri, vətənə xəyanətdə təqsirləndirilən akademik Ramiz Mehdiyevin qızı Kamilə Əliyevanın vəzifədən çıxarıldığı barədə məlumat yayılıb.

“Modern.az”a daxil olan məlumatda bildirilir ki, R.Mehdiyevin qızı Kamilə Əliyeva Bakı Dövlət Universitetinin Sosial və pedaqoji psixologiya kafedrasının müdiri vəzifəsindən azad olunub. Onun kafedrada adi müəllim vəzifəsində qaldığı qeyd olunur.

“Modern.az” məlumatı dəqiqləşdirmək üçün Bakı Dövlət Universiteti ilə əlaqə saxlasa da, suala cavab verilməyib.

Qeyd edək ki, Bakı Dövlət Universitetinin Biologiya fakültəsini bitirən Kamilə Əliyeva ixtisasca bioloq olsa da, psixologiya elmləri üzrə namizədlik və doktorluq dissertasiyaları müdafiə edib. O, 2010-cu ildə Sosial və pedaqoji psixologiya kafedrasının müdiri vəzifəsinə təyin olunub. 2009-cu ildə BDU-nun Elmi Şurası tərəfindən “ilin müəllimi” adına layiq görülüb, Təhsil Nazirliyinin fəxri fərmanı ilə təltif edilib.

2010-2011-ci illərdə Ailə, Qadın və Uşaq Problemləri üzrə Dövlət Komitəsi ilə səmərəli əməkdaşlığa görə komitə tərəfindən diplomla, 2012-ci ildə Bakı Dövlət Universitetinin Fəxri Fərmanı ilə təltif olunub.