TDT-nin birinci iclasında bəyannamə imzalandı | Hansı tədbirlər müzakirə edildi?

Sentyabrın 6-da daxili işlər naziri general-polkovnik Vilayət Eyvazovun başçılıq etdiyi nümayəndə heyəti Qırğız Respublikasının Çolpon-Ata şəhərində keçirilən Türk Dövlətləri Təşkilatına üzv dövlətlərin daxili işlər nazirlərinin birinci iclasında iştirak edib.

İclasda Türkiyə, Qırğızıstan, Qazaxıstan və Özbəkistanın daxili işlər nazirləri və TDT-nin baş katibi Kubanıçbek Omurəliyev iştirak ediblər.

Türk Dövlətləri Təşkilatına üzv ölkələrin daxili işlər nazirləri arasında əməkdaşlığın genişləndirilməsi və dərinləşdirilməsi, cinayətkarlığa, o cümlədən ekstremizmə, insan alverinə, kibercinayətkarlığa, narkotik vasitələrin qanunsuz dövriyyəsi, qeyri-qanuni miqrasiyaya qarşı mübarizə sahəsində birgə mübarizə tədbirləri müzakirə edilib.

Tərəflər bu kimi cinayətlərə qarşı mübarizədə daxili işlər orqanları arasında əməkdaşlığın vacibliyini vurğulayıblar. İclasın yekunları üzrə Birgə Bəyannamə imzalanıb, daxili işlər nazirlərinin ikinci iclasının 2025-ci ildə Azərbaycanda keçirilməsinə dair qərar qəbul edilib.