Türk dövlətlərində media sektorunun vəziyyəti müzakirə edildi - Baku TV

Daşkənddə “Türk dünyasında mənəvi dirçəliş və informasiya təhlükəsizliyi” forumu keçirilib.

Qeyri-Hökumət Təşkilatlarına Dövlət Dəstəyi Agentliyi, Gənclərin Sosial-İqtisadi İnkişafına Yardım İctimai Birliyi və Özbəkistan Jurnalistlər İttifaqının birgə təşkilatçılığı ilə keçirilən forumda türk dövlətlərinin media sektorunun mövcud vəziyyəti, informasiya təhlükəsizliyi, dezinformasiyaya qarşı mübarizə, media əməkdaşlığının perspektivləri və gələcək birgə layihələr geniş müzakirə olunub.

Layihə rəhbəri, İctimai Birliyin icraçı direktoru Əfsələddin Ağalarov bildirib ki, forumun əsas tərəfdaşı Özbəkistan Jurnalistlər İttifaqıdır, məqsəd təcrübə mübadiləsinin genişləndirilməsi və “deepfake” texnologiyalarına qarşı mübarizədə ortaq fəaliyyət istiqamətlərini, eləcə də vahid yol xəritəsini müəyyənləşdirməkdir.

Qeyd olunub ki, qarşılıqlı təcrübə proqramlarının təşkili sayəsində həm Azərbaycan, həm də Özbəkistan jurnalistləri bir-birinin peşəkar təcrübəsindən faydalana bilərlər.

Tədbirdə Azərbaycan, Özbəkistan, Türkiyə, Qazaxıstan, Qırğızıstan və Türkmənistandan vətəndaş cəmiyyəti təmsilçiləri, tədqiqatçılar iştirak ediblər.

Forumun panel müzakirələrində Özbəkistan Jurnalistlər İttifaqının sədri Şöhrət Arif, Mətbuat Şurasının Sosial Media Komissiyasının sədri Hacıbəy Heydərli, Kommunikasiya və Jurnalistika Universitetinin professorları çıxış ediblər.

Müzakirələrdə Özbəkistan və Azərbaycan mediası arasında formalaşmış əməkdaşlıq münasibətlərindən, dezinformasiyaya qarşı mübarizə, rəsmi məlumatların operativ şəkildə ictimaiyyətə çatdırılması, sosial medianın artan təsiri, süni intellekt vasitəsilə yaradılan məzmunun doğurduğu çağırışlar və informasiyanın dəqiqliyinin yoxlanılmasının əhəmiyyəti vurğulanıb.

Tədbirin sonunda "Mənəvi dirçəlişin anatomiyası" adlı sənədli film nümayiş olunub.