Türkiyə Parlamentinin yeni üzvləri bəlli oldu

Türkiyədə 28-ci çağırış parlament seçkilərində Nazirlər Kabinetinin 15 üzvü və vitse-prezident Fuat Oktay deputat seçilib.

Bu barədə Anadolu Agentliyi məlumat verib. Fuat Oktayın namizədliyi Ankaradan irəli sürülüb. Türkiyənin xarici işlər naziri Mövlud Çavuşoğlu Antalyadan, milli müdafiə naziri Hulusi Akar isə Kayseridən millət vəkili seçiliblər.

Türkiyənin sənaye və texnologiya naziri Mustafa Varank, enerji və təbii sərvətlər naziri Fatih Dönmez, ədliyyə naziri Bekir Bozdağ, ailə və sosial xidmətlər naziri Derya Yanık, ətraf mühit, şəhərçilik və iqlim naziri Murat Kurum, təhsil naziri Mahmut Özer, gənclər və idman naziri Mehmet Muharrem Kasapoğlu, ticarət naziri Mehmet Muş da parlamentdə təmsil olunacaqlar.

Qeyd edək ki, xəzinə və maliyyə naziri Nureddin Nebati, daxili işlər naziri Süleyman Soylu, nəqliyyat və infrastruktur naziri Adil Karaismailoğlu, kənd təsərrüfatı və meşəçilik naziri Vahit Kirişçi, əmək və sosial müdafiə naziri Vedat Bilgin Ankaradan deputat seçiliblər.

Bildirək ki, səslərin sayılması prosesi davam edir. Son məlumatlara görə Hakim Ədalət və İnkişaf Partiyasından 266, Cümhuriyyət Xalq Partiyasından 168, Yaşıl Sol Partiyadan 62, Milliyyətçi Hərəkat Partiyasından 51, İYİ Partiyadan 44, Yenidən Rifah Partiyasından 6, Türkiyə İşçi Partiyasından isə 4 millət vəkili yeni parlamentdə təmsil olunacaq.