Türkiyəni çətin günündə tək buraxmayan ölkələr
Ukrayna Prezidenti Volodimir Zelenski baş vermiş zəlzələ ilə əlaqədar Türkiyə xalqına və həmkarı Rəcəb Tayyib Ərdoğana başsağlığı verib.
“Bu çətin vaxtda Türkiyə xalqının yanındayıq. Zəlzələnin nəticələrinin aradan qaldırılması üçün əlimizdən gələni etməyə hazırıq”, - deyən Zelenski Türkiyəyə yardımını da əsirgəməyib.
Rusiya Prezidenti Vladimir Putin də türkiyəli həmkarına başsağlığı verib və bildirib ki, ölkəsi zəlzələnin fəsadlarının aradan qaldırılması işlərində yardım göstərməyə hazırdır.
İsrail Prezidenti İsaaq Hersoq da ölkəsinin səlahiyyətli orqanlar vasitəsilə Türkiyəyə hər zaman hər cür köməklik edə biləcəyini deyərək rəsmi Ankaraya dəstək nümayiş etdirib.
Güclü zəlzələnin yaratdığı dağıntıların aradan qaldırılması üçün Türkiyəyə yardım təklifi edənlər arasında amerikalı milyarder, “SpaceX” və “Tesla” şirkətlərinin qurucusu İlon Mask da var. O, təsisçisi olduğu “SpaceX” şirkətinin “Starlink” peyklərini Türkiyəyə göndərməyə hazır olduğunu açıqlayıb.
Avropa İttifaqı Şurasının Prezidenti Şarl Mişel və İttifaqın xarici əlaqələr və təhlükəsizlik siyasəti üzrə ali nümayəndəsi Josep Borrel, ATƏT sədri Buyar Osmani də dağıntıların aradan qaldırılması üçün Ankaraya yardım təklifi edənlərdəndir.
Bundan başqa, hökumət başçıları və digər rəsmi şəxslərin timsalında Almaniya, Bolqarıstan, Gürcüstan, Böyük Britaniya, Fransa, Pakistan və İsrail də Türkiyə xalqına başsağlığı verib, yardıma hazır olduqlarını bildiriblər.