Türkiyənin nazir müavini haqqında maraqlı fakt

Azərbaycanda səfərdə olan Türkiyə milli müdafiə nazirinin müavini Şuay Alpayla bağlı maraqlı fakt ortaya çıxıb.

Nazir müavininin əslən Azərbaycandan olan Samuxlu Qaçaq Məmmədqasımın nəvəsi olduğu məlum olub. Bu haqda Şuay Alpay çıxışlarının birində deyib.

O, babasının Azərbaycanın müstəqillik tarixində adının qalmasından qürur duyduğunu bildirib.

Qeyd edək ki, Qaçaq Məmmədqasım 1897-ci ildə Gəncə quberniyasının Samux nahiyəsinin Tomulu kəndində anadan olub. Qaçaq Məmmədqasım 1932-cü ilin yanvar ayında İran ərazisinə keçib. Öz dəstəsi ilə İran ərazisində məskunlaşsa da, bolşeviklər yenə də onlara qarşı təxribatlarını davam etdiriblər.

1933-cü ilin yayında Məmmədqasımın dəstəsində 8 nəfər müəmmalı şəkildə karvansarada öldürülür. Bunun təxribat olduğunu anlayan Qaçaq Məmmədqasım 1933-cü ilin oktyabrında İrandan Türkiyəyə keçir. Bir müddət sonra isə qardaşı Əsədlə Elazığ şəhərinə köçür və o, burada ailə qurur. Qaçaq Məmmədqasım 69 yaşında 1967-ci ildə Elazığda vəfat edir.