Ukraynanın Bakıdakı səfiri Azərbaycanla əlaqələri yüksək qiymətləndirdi

"Azərbaycan Cənubi Qafqaz regionunda Ukraynanın əsas iqtisadi tərəfdaşıdır".

Bunu Ukraynanın Azərbaycandakı səfiri Yuri Qusev "Qara dəniz-Xəzər logistika forumu 2025: dəhlizlər, yüklər, infrastruktur" adlı konfransda bildirib.

"Azərbaycan Cənubi Qafqaz regionunda Ukraynanın əsas iqtisadi tərəfdaşıdır, Avropaya enerji daşıyıcılarının tədarükünün zəruriliyi, eləcə də Orta Dəhlizin və Qərblə Şərq arasında əlaqələrin inkişafı onun əhəmiyyətini daha da artırır. Məhz buna görə nəqliyyat sahəsində əməkdaşlığın, eləcə də GUAM formatı da daxil olmaqla Qara dəniz və Xəzər dənizi arasında regional qarşılıqlı əlaqələrin inkişafı prioritet istiqamətlərdən biridir", ‒ deyə səfir bildirib.

O həmçinin qeyd edib ki, Orta Dəhliz və "Xəzər-Qara dəniz ‒ Avropa Yaşıl Enerji Dəhlizi" kimi strateji nəqliyyat və enerji layihələri dənizləri regionların davamlı inteqrasiyası yoluna çevirir.

"Bu təşəbbüslər təcavüz qarşısında iqtisadi dayanıqlılığın güclü alətləridir. Bundan əlavə, bu kimi təşəbbüslər artıq dəyərinə və çatdırılma vaxtına görə Rusiya marşrutlarını üstələyib.

Bu gün Qara dəniz və Xəzər dənizi təcavüzkar nəzarət zonası ilə ölkələr koalisiyası arasında sərhədə çevrilib. Bu koalisiya belə suları inkişaf, inteqrasiya və təhlükəsizlik kanallarına çevirir. Logistik yolların optimallaşdırılması ikitərəfli ticarəti əhəmiyyətli dərəcədə asanlaşdıracaq və tranzit həcmlərini artıracaq başlıca vəzifədir", ‒ deyə səfir əlavə edib.

Onun sözlərinə görə, bu istiqamətdə Ukrayna və Gürcüstan arasında bərə marşrutunun bərpası üçün tədbirlər görülür: "Bu, Orta Dəhlizin və GUAM dəhlizinin inkişafı çərçivəsində Ukraynanı Cənubi Qafqaz və Mərkəzi Asiya dövlətləri ilə birləşdirən dəniz-dəmir yolu əlaqəsinin bir hissəsidir".