UNESCO-da çaxnaşma yaradan Yallı: ermənilər rəqsimizə də müdaxilə etdi

Sentyabrın 18-də Birləşmiş Millətlər Təşkilatının Elm, Təhsil və Mədəniyyət üzrə ixtisaslaşmış qurumu UNESCO “X” sosial şəbəkə hesabında Azərbaycanın milli rəqsi olan “Yallı” ilə bağlı paylaşım edib.

“Yallı” rəqsi ritmik addımları və rəngarəng kostyumları ilə Azərbaycan canlı irsinin mahiyyətini təcəssüm etdirir. “Yallı” 2018-ci ildə Təcili Qorunma Siyahısına daxil olunub. Biz bu ənənəni birlikdə qorumalıyıq”, – deyə paylaşımda qeyd olunub.

Ancaq görünən odur ki, sosial şəbəkədəki erməni istifadəçilərin təzyiq və təxribatından sonra qurum paylaşımı nədənsə silməli olub. Milli rəqsimizi “Koçari” adlandıraraq öz tarixlərinin bir parçasıymış kimi sərsəmləyən erməni istifadəçilər buna görə UNESCO-ya təşəkkür etməyi də unutmayıblar.

Paylaşımın hansı səbəbdən silindiyini bilməsək də, qurumun rəsmi saytına daxil olaraq qısa bir araşdırma apardıq. UNESCO-nun qeyri-maddi mədəni irs siyahısında hələ də “Yallı” rəqsi Azərbaycanın sərvətləri arasındadır. Yəni necə lazımdırsa elə o cür. “Erməni təxribatı sosial şəbəkədə necə qalib gəlib?”, bu sualın cavabını bilməsək də, həqiqətlərin üstünü heç bir kölgənin örtə bilməyəcəyi gün kimi aydındır.

Qeyd edək ki, “Yallı” Azərbaycanın ən qədim rəqs növlərindən biridir. “Yallı” (“Köçəri”, “Tənzərə”), “Naxçıvanın ənənəvi qrup rəqsləri” 2018-ci ilin 26 noyabr - 1 dekabr tarixlərində Mavriki Respublikasının paytaxtı Port-Luis şəhərində UNESCO-nun Qeyri-maddi mədəni irsin qorunması üzrə Hökumətlərarası Komitəsinin 13-cü sessiyasında qəbul edilmiş qərarla Təcili Qorunma Siyahısına salınıb.