X Qlobal Bakı Forumu işə başlayır

“Bu il Azərbaycan qlobal arenada, xüsusilə də enerji təhlükəsizliyi geostrateji baxımdan çox vacib rol oynayır”.

Bunu Serbiyanın sabiq prezidenti Boris Tadiç X Qlobal Bakı Forumu ilə əlaqədar martın 8-də keçirilən mətbuat konfransında deyib.

“Azərbaycan olmasaydı, Avropada enerji sabitliyi olmazdı, biz böyük problemlərlə üzləşərdik. Xüsusən enerji təhlükəsizliyi və geostrategiya baxımından Azərbaycanın bu il dünya miqyasında çox mühüm rol oynadığını vurğulamalıyam. Bu illər ərzində Azərbaycan inkişaf edib. Xüsusən bu il ölkəniz Avropanın enerji təhlükəsizliyində çox mühüm rol oynayıb”, - deyə o qeyd edib.

Nizami Gəncəvi Beynəlxalq Mərkəzinin həmsədri İsmail Serageldin isə bildirib ki, son vaxtlar baş verən beynəlxalq hadisələr, xüsusən də Ukraynadakı müharibə dünyada sülhün bərqərar olmasına təhdid yaradır.

“Forumda xüsusilə bu gün seçim qarşısında qalan dünyanın qloballaşması və gələcək inkişafı, bölünmüş dünyada dayanıqlılıq, bəşəriyyət üçün əsas təhlükələr və digər məsələlər müzakirə olunacaq. Bakı Forumu dünyanın aktual promlemlərinin müzakirəsi üçün əsas platformaya çevrilib”, - deyə İsmail Serageldin əlavə edib.

Qeyd edək ki, X Qlobal Bakı Forumu martın 9-dan 11-dək keçiriləcək.