XİN-dən Paşinyanın iddialarına cavab

Ermənistanın Baş naziri Nikol Paşinyanın sonuncu mətbuat konfransı zamanı Azərbaycana qarşı səsləndirdiyi ifadələr tamamilə əsassız və tarixi faktları kobudcasına təhrif edən iddiaları bölgədə sülhün bərqərar edilməsi prosesinə növbəti zərbədir.

Bunu Xarici İşlər Nazirliyinin mətbuat katibi Ayxan Hacızadə Nikol Paşinyanın martın 14-də keçirdiyi mətbuat konfransı zamanı səsləndirdiyi əsassız iddialara münasibət bildirərkən deyib.

Qurumun sözçüsü qeyd edib ki, Paşinyanın üzərinə götürdüyü öhdəliklərdən boyun qaçıraraq həyata keçirdiyi anti-Azərbaycan kampaniyası, o cümlədən sülh sazişi üzrə danışıqları və beynəlxalq vasitəçilərin səylərini heçə endirən ritorikası Ermənistan üçün xeyirli gələcək vəd etmir.

Ayxan Hacızadə onu da vurğulayıb ki, Paşinyanın növbəti dəfə erməni sakinlərlə dialoq məsələsinə müdaxilə etməyə çalışması, Azərbaycanın Qarabağ bölgəsi üzərində beynəlxalq səviyyədə tanınmış suverenliyinə və ərazi bütövlüyünə qarşı təxribat dolu bəyanatlar səsləndirməsi, “Qarabağın xalqı və hökuməti” kimi ifadələr işlətməsi qəbuledilməzdir.

Xarici İşlər Nazirliyi rəsmisinin sözlərinə görə, Paşinyanın yalnız Ermənistanın təkliflərinin qeyd olunduğu və Azərbaycanın təkliflərinin nəzərə alınmadığı layihəni imzalanmağa hazır olduğunu bəyan etməsi onun sülh prosesinə laqeyd yanaşmasının növbəti sübutudur və Ermənistanın bu destruktiv fəaliyyətləri beynəlxalq ictimaiyyət tərəfindən qınanmalı və onların qarşısı alınmalıdır.