Zakir Həsənov Hulusi Akara məktub göndərdi

“Cənab Hulusi Akar, sizə öz adımdan və Azərbaycan Ordusunun şəxsi heyəti adından Türkiyənin milli müdafiə naziri olduğunuz müddətdə birgə fəaliyyətimizə görə minnətdarlığımı bildirirəm”.

Bu sözləri müdafiə naziri Zakir Həsənov Türkiyənin keçmiş milli müdafiə naziri Hulusi Akara göndərdiyi minnətdarlıq məktubunda bildirib.

“Siz daima Azərbaycan-Türkiyə arasında hərbi əməkdaşlığın inkişaf etdirilməsinə və Azərbaycan Ordusunun təkmilləşdirilməsinə, döyüş qabiliyyətinin yüksəldilməsinə böyük töhfə vermisiniz. Torpaqlarımızın işğaldan azad edilməsi uğrunda gedən Vətən müharibəsində də Azərbaycan xalqına və Ordumuza daim mənəvi dəstək olmusunuz.

Siz həmişə Azərbaycanı və Azərbaycan Ordusunu sevmisiniz. Əminəm ki, Türkiyə Böyük Millət Məclisində fəaliyyətiniz zamanı da hər iki qardaş ölkənin ordularının qüdrətlənməsi naminə əməyinizi əsirgəməyəcəksiniz. Sizi öz adımdan və Azərbaycan Ordusunun şəxsi heyəti adından təbrik edir, gələcək fəaliyyətinizdə uğurlar arzulayıram”, – deyə Zakir Həsənovun Hulusi Akara göndərdiyi məktubda qeyd edilib.