Zakir Həsənov Türkiyənin qərargah rəisi ilə görüşdü

Türkiyəyə işgüzar səfəri çərçivəsində Azərbaycanın müdafiə naziri general-polkovnik Zakir Həsənov Eskişehirdə 1-ci Aviasiya bazasının komandiri general-mayor Ertan Uzunla görüşüb.

Görüşdə hərbi, həmçinin hərbi təhsil sahələrində əməkdaşlıq və qarşılıqlı maraq doğuran bir çox məsələlərə dair ətraflı fikir mübadiləsi aparılıb.

Daha sonra Zakir Həsənov Türkiyənin milli müdafiə naziri Yaşar Gülerlə birgə 2023-2024-cü uçuş təlim ilinin açılış mərasimində iştirak edib. Uçuş əmri verildikdən sonra qonaqlar hərbi aviasiya vasitələrinin uçuşlarını izləyiblər.

Sonra general-polkovnik Zakir Həsənov Ankaraya yola düşüb. Burada Türkiyə Respublikası Silahlı Qüvvələrinin Baş Qərargah rəisi ordu generalı Metin Gürakla görüşü baş tutub.

Görüşdə iki qardaş ölkənin orduları arasında hərbi əməkdaşlığın inkişaf perspektivləri və qarşılıqlı maraq doğuran bir sıra məsələlər müzakirə olunub. İki ölkənin müdafiə nazirləri Ankarada keçirilən “TEKNOFEST” aerokosmik və texnologiya festivalında da iştirak ediblər.