Zaxarova ATƏT-i tənqid etdi | Bu, Bakı-İrəvan münasibətlərinin normallaşmasına yardım edəcək

ATƏT-in Minsk qrupu öz fəaliyyətini hələ 2022-ci ilin fevralında dayandırıb.

Bunu Rusiya Xarici İşlər Nazirliyinin rəsmi nümayəndəsi Mariya Zaxarova keçirdiyi brifinqdə bildirib.

Onun sözlərinə görə, Minsk qrupu fəaliyyətini məhz fransalı və amerikalı həmsədrlərin günahı ucbatından bitirib:

“Minsk qrupunun fəaliyyətdə olan mandatlarına baxmayaraq, onlar heç bir məsləhətləşmə, kommunikasiya olmadan rusiyalı həmsədrlə təmaslardan imtina ediblər. Heç ATƏT çərçivəsində məsləhətləşmələr aparmayıblar. Onlar əvvəlcədən təyin olunan tədbirləri ləğv ediblər və hələ də bunun səbəblərini açıqlamayıblar.

Xatırladım ki, 2022-ci ilin oktyabrın 6-da Praqada Azərbaycan Prezidenti, Ermənistanın Baş naziri, Fransa Prezidenti və Avropa Şurasının sədrinin birgə bəyanatı qəbul olunub. Bütün bunlar ona gətirib çıxarıb ki, Minsk qrupu öz fəaliyyət predmetini itirib. Deməli, Minsk qrupu ilə birlikdə ATƏT-in fəaliyyətdə olan sədrinin şəxsi nümayəndəsi vəzifəsinin ləğv olunması məntiqlidir. Belə təxirəsalınmaz tədbir Azərbaycan və Ermənistan arasında çoxdan gözlənilən münasibətlərin normallaşmasına yardım etmək məqsədi daşıyır. Mənə elə gəlir ki, elə bu mövqedən çıxış etmək lazımdır”.

Çıxışı zamanı M.Zaxarova Qərbin Rusiyaya qarşı münasibətinə də toxunub.