Zaxarova saxlanılan rusiyalılar və Minsk qrupunun ləğvi barədə görün nə dedi

“Azərbaycanda həbsdə olan 13 rusiyalının azadlığa buraxılması Moskva ilə Bakı arasında münasibətlərin normallaşmasına mühüm töhfə ola bilər”.

Bunu Rusiyanın Xarici İşlər Nazirliyinin rəsmi nümayəndəsi Mariya Zaxarova bildirib.

“Rusiya vətəndaşlarının azad edilməsi Rusiya ilə Azərbaycan arasında münasibətlərin normallaşdırılması istiqamətində vacib addımdır. Məsələ avqustun 22-də Həştərxanda keçirilən Rusiya-Azərbaycan hökumətlərarası iqtisadi əməkdaşlıq komissiyasının iclasında ətraflı müzakirə olunub və Azərbaycan nümayəndə heyətinə Rusiyanın mövqeyi çatdırılıb. 3, 14 və 23 iyul tarixlərində konsulluq əməkdaşları Bakıda saxlanılan rusiyalıları ziyarət edib. Dördüncü görüş üçün müraciət göndərilib, lakin Azərbaycan tərəfi hələlik buna razılıq verməyib”, ‒ o söyləyib.

Mariya Zaxarova həmçinin Avropada Təhlükəsizlik və Əməkdaşlıq Təşkilatının Qarabağ münaqişəsi üzrə Minsk qrupunun buraxılması ilə bağlı qərarına da münasibət bildirib. O, bu qərarı haqlı hesab edib. Diplomat xatırladıb ki, Rusiya Federasiyası ATƏT-in digər üzvləri ilə birlikdə konsensus qaydası əsasında bu qərarın qəbul edilməsində birbaşa iştirak edib.

“Biz bu addımı haqlı hesab edirik, bu, regionda vəziyyətin köklü dəyişməsi baxımından əsaslandırılıb”, ‒ deyə o qeyd edib.

“Minsk institutlarının məhdudlaşdırılması təşəbbüsü Ermənistan və Azərbaycana məxsusdur”, ‒ deyə Zaxarova xatırladıb.