Zaxarovaya şikayət edən erməni jurnalistin məkrli oyunları | Ayk niyə sülhdən danışmır?

Oktyabrın 16-da Rusiya Xarici İşlər Nazirliyi mətbuat xidmətinin rəhbəri Mariya Zaxarova brifinqdə erməni jurnalist Ayk Xalatyanın sualını cavablandırıb.

A.Xalatyan M.Zaxarovaya bildirib ki, Azərbaycan guya Xankəndidə ermənilərə məxsus tarixi tikililəri sökür. Ağaya şikayət xarakterli suala cavab verən Mariya Zaxarova isə “bildiyim qədər, söhbət Azərbaycan ərazisindən gedir. Orada bu ölkənin qanunları işləyir”, – deyə cavab verib.

Ayk yenə də şikayət edərək Azərbaycan-NATO əməkdaşlığının guya qonşu ölkələrə, regiona zərər verəcəyini iddia edir və Rusiya XİN rəsmisindən bunu şərh etməsini istəyir.

Erməni jurnalist suallarına istədiyi cavabı ala bilmir. Buna görə də növbəti dəfə cəhd edir. Ayk Mariya Zaxarovaya 3-cü sualını ünvanlayır. Bu dəfə də Azərbaycanı Qarabağda İkinci Dünya müharibəsinə aid tarixi abidələri sökməkdə ittiham edir.

Fikir verin, hər 3 sual Azərbaycana qarşı hazırlanıb və onlardan heç biri sülhlə bağlı deyil.

Jurnalist Ayk Xalatyanın həyat və fəaliyyətinə baxdıqda görmək olur ki, o, Azərbaycan-Ermənistan münasibətlərinin normallaşması istiqamətində bir dəfə də təşəbbüs göstərməyib, bu istiqamətdə suallar verməyib.

O, həm də siyasi şərhçi kimi fəaliyyət göstərir. İrəvanda Strateji Araşdırmalar və Təşəbbüslər üzrə Analitik Mərkəzin rəhbəridir. Onun analitik yazıları da jurnalistliyi kimi Azərbaycana qarşı provakativ fikirlərlə doludur.

1978-ci ildə doğulan Ayk Xalatyan yaşadığı Ermənistan üçün də sülh arzulamır, bununla bağlı hər hansı siyasi fikri, araşdırması yoxdur. Yazılarına baxdıqda ancaq inqilaba çağırışlara, Baş nazir Paşinyan əleyhinə təbliğata rast gəlmək mümkündür. Qatıldığı brifinqlərdə də hər zaman sülh istqamətli deyil, münaqişələri qızışdırıcı suallar verir.