Zelenski Putinin həbsinə dair qərarı alqışladı

Ukrayna Prezidenti Volodimir Zelenski Beynəlxalq Cinayət Məhkəməsinin Rusiya lideri Vladimir Putinin həbsinə dair order verməsinə münasibət bildirib.

O, bununla bağlı “Telegram” kanalında paylaşım edib. “Bu, tarixi məsuliyyətin başlayacağı tarixi qərardır”, - deyə V.Zelenski qeyd edib.

Ukrayna Prezidenti bildirib ki, uşaqları ailələrindən ayırmaq, qohumları ilə əlaqə imkanından məhrum etmək, onları Rusiya ərazisində gizlətmək, ucqar rayonlara atmaq – bütün bunlar Rusiyanın açıq-aşkar yürütdüyü dövlət siyasəti, dövlət qərarlarıdır.

Qeyd edək ki, martın 17-də Beynəlxalq Cinayət Məhkəməsi Vladimir Putinin və Rusiya Prezidenti yanında uşaq hüquqları üzrə səlahiyyətli şəxs Mariya Alekseyevna Lvova-Belovanın həbsinə dair order verib.