2025-ci ildə istehlakçı müraciətlərinin 30 faizi rəqəmsal sahə ilə bağlı olub

"Apardığımız təhlillər göstərir ki, elektron və rəqəmsal bazarların gətirdiyi üstünlüklərlə yanaşı, istehlakçılar müəyyən risklərlə də üzləşirlər. Bunların arasında ən çox yayılanlardan biri rəqəmsal sahədə baş verən dələduzluq, şəxsi məlumatlara qanunsuz müdaxilə və buna bənzər hallardır".

Bu fikirləri "Müasir rəqəmsal dünyada istehlakçılar: elektron ticarət, rəqəmsal xidmətlər və təhlükəsizlik məsələləri" mövzusunda keçirilən tədbirdə Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyi sədrinin birinci müavini Cəfər Babayev deyib.

O bildirib ki, 2025-ci ildə daxil olan müraciətlərin təxminən 30 faizi məhz rəqəmsal sahədə məlumatlardan istifadə ilə bağlı olub. Bu nəticə digər qurumların apardıqları təhlillərdə də öz əksini tapır.

"Bu sahədə istehlakçı hüquqlarının müdafiəsi üçün dövlət orqanı olaraq bizim qanunvericiliklə müəyyən edilmiş səlahiyyətlərimiz və alətlərimiz mövcuddur. Lakin istehlakçı hüquqlarını təkcə qanunla verilmiş səlahiyyətlərlə deyil, eyni zamanda "yumşaq güc" vasitələri ilə də təmin etməyə çalışırıq ", – deyə C.Babayev əlavə edib.