Dövlət Xidmətindən internet bağlantısı və informasiya təhlükəsizliyi barədə məlumat

Azərbaycanda internet bağlantısının dayanıqlılığı və informasiya təhlükəsizliyi təmin olunur.

Bu barədə Xüsusi Rabitə və İnformasiya Təhlükəsizliyi Dövlət Xidməti məlumat yayıb.

Məlumatda bildirilir ki, son zamanlar baş verən hadisələrin fonunda bəzi media subyektlərində ölkəmizin qlobal internet şəbəkəsinə bağlantısında problemlərin yaranma ehtimalı və informasiya təhlükəsizliyinə təhdidlərlə bağlı məlumatlar yayılmaqdadır.

"Qeyd olunan narahatlıqlarla əlaqədar bildirmək istəyirik ki, ölkəmizin əsas internet daşıyıcıları tərəfindən qlobal internet şəbəkəsinə bağlantı mübadilə olan internetin tutumu nəzərə alınmaqla coğrafi baxımdan bir neçə istiqamətdə alternativlərlə tam təmin olunub. Bu səbəbdən də ölkəmizin internet trafikinin daşınmasında konkret bir ölkədən asılılığı yoxdur.

Eyni zamanda "AzstateNet" şəbəkəsi üzərindən fəaliyyətləri təmin olunan dövlət informasiya ehtiyatlarının internet təminatında alternativlik prinsipi tətbiq edilib, informasiya təhlükəsizliyi üzrə tədbirlər isə 24/7 rejimində monitorinq olunmaqdadır", ‒ deyə açıqlamada qeyd olunub.