"Apple" yayılan xəbərlərə belə cavab verdi | Şirkətin əməkdaşından iddialı açıqlama

“Şəxsi hesabınızı “iPhone”, “iPad” və ya “MacBook”da istifadə edirsinizsə, cihazda saxlanılan hər hansı məlumat şirkət tərəfindən yoxlanılır”.

Belə bir açıqlama ilə “Apple”ın əməkdaşı çıxış edib. O bununla bağlı şirkətə qarşı iddia qaldırıb.

Qurumun reklam texnologiyaları departamentinin işçisi Amar Bhaktın sözlərinə görə, şirkət əməkdaşlardan öz şəxsi cihazlarında onların elektron poçtuna, foto arxivinə, sağlamlıq və digər şəxsi məlumatlarına çıxış imkanı verən proqram təminatı quraşdırmağı tələb edib.

Bundan əlavə, o bildirib ki, rəhbərlik tərəfindən iş şəraitini müzakirə etməmək, media ilə əlaqə saxlamamaq və şirkət daxilindəki pozuntular barədə informasiyanı bölüşməmək tapşırılıb.

2020-ci ildən bu şirkətdə çalışan A.Bhakt qeyd edib ki, ona podkastlarda işi haqqında danışmaq qadağan edilib. Buna görə də iş şəraiti ilə bağlı məlumatları “LinkedIn” profilindən silmək məcburiyyətində qalıb.

“Apple” isə bütün bunlara cavab olaraq iddiaların əsassız olduğunu bildirib.