250, 300 manatdan başlayır qiymətlər… | Niyə yeni uşaq bağçaları tikilmir?

Müasir dövrdə nəinki paytaxtda, eləcə də bəzi bölgələrdə dövlət bağçalarının sayının azlığı valideynlər arasında narazılığa səbəb olub.

Bir zamanlar var olanlar da ya özəlləşdirilib, ya da təyinatı dəyişdirilib. Bu sahədə uzun müddətdir ki, mövcud problem isə həll yolunu tapmır. Nəticədə valideynlər çıxış yolunu 150 manatdan 1200 manata qədər təklif edilən özəl bağçalarda görürlər.

Maraqlıdır, bu gün paytaxtda sürətlə tikilən yeni binalarla yanaşı, niyə uşaq bağçaları da inşa edilmir?

Məktəbəqədər və Ümumi Təhsil üzrə Dövlət Agentliyindən bildirilib ki, əhatəliliyin artırılması üçün yeni layihələr hazırlanır:

“İcma əsaslı məktəbəqədər təhsilin inkişafı” layihəsinin məqsədi 3-5 yaşlı uşaqların 4 inkişaf sahəsini əhatə edən bacarıqlarının artırılması, məktəblə birgə əməkdaşlıq nəticəsində ibtidai təhsilin keyfiyyətini artırmaqdan ibarətdir. Hazırkı dövrədək icma əsaslı məktəbəqədər təhsil qrupları ölkənin 55 şəhər və rayonunu əhatə edib.

Digər bir layihə Elm və Təhsil Nazirliyinin özəl məktəbəqədər təhsil müəssisələri üçün qrant müsabiqəsidir. Müsabiqə ilə dövlət məktəbəqədər təhsil müəssisələrinə qəbul oluna bilməyən uşaqlar özəl bağçalarda boş qalan yerlərə cəlb edilirlər və təhsil haqqının bir hissəsi də qrant vasitəsilə maliyyələşəcək”.