800 minlik qalmaqal | İlhamə Quliyevanın bacısı qızı nədə ittiham olunur?

Bakıda kosmetoloji xidmət göstərən qadın külli miqdarda dələduzluqda ittiham olunur.

Nigar Həsənova polis tərəfindən aparılan araşdırmalarla dələduzluq faktı üzrə başlanılmış cinayət işi çərçivəsində saxlanılıb. Onun 18 nəfərin ümumilikdə 811 337 manat pul vəsaitini ələ keçirməsi müəyyən edilib.

Ötən gün Nigar Həsənova barəsində Xətai Rayon Məhkəməsinin qərarı ilə 3 ay 17 gün müddətinə həbs qətimkan tədbiri seçilib.

Nigar Həsənovanın mərhum Xalq artisti İlhamə Quliyevanın bacısı İradə Həsənovanın qızı olduğu bildirilir.

Bu şəxslə bağlı cinayət işi üzrə bəzi faktlar üzə çıxıb. “Qafqazinfo”nun əldə etdiyi məlumata görə, polis tərəfindən aparılan araşdırmalarla dələduzluq faktı üzrə başlanılmış cinayət işi çərçivəsində 18 nəfər zərərçəkən müəyyən edilib.

Nigar Həsənovanın həbs edilməsi ilə bağlı xəbər yayımlandıqdan sonra daha bir neçə nəfər “Qafqazinfo” ilə əlaqə saxlayaraq onların da pullarının adıçəkilən şəxs tərəfindən ələ keçirildiyini iddia ediblər. Bu əsasla zərərçəkən şəxslərin sayının və vurulan zərərin miqdarının artacağı da istisna edilmir.