"Abırsız aktrisa bakirə qızı oynaya bilməz" | Cəmiyyət niyə pozulmağa doğru gedir? - AMİN

“Amin” verilişində bu dəfə Əməkdar artist Gülşad Baxşıyeva və ilahiyyatçı Aslan Həbibovla sədaqət mövzusu müzakirə olunub.

Aslan Həbibov islamda sədaqətli olmağın önəmindən söz açıb:

“İslam insanları yalnız inanc baxımından yox, həm də əxlaqi yöndən yetişdirməyə çalışır. Sədaqətli olmaq peyğəmbərlərin və möminlərin xüsusiyyətlərindəndir. Allahın bizi yaratdığını, bu dünyaya göndərdiyini və öldükdən sonra yeni bir həyatın başladığını qəbul edərək bunlara uyğun hərəkət etmək insanın Yaradana olan sədaqətinin nümunəsi hesab olunur”.

Aktrisa Gülşad Baxşıyeva isə verilişdə peşəyə sədaqətdən danışıb. O, aktyorluq sənətində uğur qazanmağın yalnız istedadla deyil, eyni zamanda peşəyə sadiqlik və dürüstlüklə mümkün olduğunu vurğulayıb.

“Aktrisada abır-həya olmalıdır. Abırsız qadın bakirə qız rolunu oynaya bilməz. Çünki onun içi çirklidir. Bizim peşəmiz dəyişmə sənətidir. 27 yaşımda həyat yoldaşım məndən pozğun qadın rolunu oynamağımı istədi. Tamaşada rolu elə ifa etdim ki, hamı içib səhnəyə çıxdığımı düşündü. Əgər rola girə bilmirsənsə, aktyor deyilsən”, ‒ deyə o bildirib.