Agentlik təhlükəli vəziyyətlə bağlı azərbaycanlı dənizçilərə çağırış etdi - Baku TV

Son aylarda Qara və Azov dənizlərində xarici dövlətlərin bayrağı altında üzən gəmilərdə azərbaycanlı dənizçilərin həlak olması və yaralanması onların təhlükəsizliyi məsələsini yenidən aktuallaşdırıb.

Dövlət Dəniz və Liman Agentliyinin mətbuat katibi Pərvanə İmanova bildirib ki, xarici sularda çalışan azərbaycanlı dənizçilərlə bağlı baş verən hadisələr qurumda ciddi narahatlıq yaradıb.

“Son aylarda müxtəlif dövlətlərin bayrağı altında çalışan azərbaycanlı dənizçilərin həlak olması ilə bağlı xəbərlər bizi dərindən sarsıdır. Dənizçilərimizi öz həyat və sağlamlıqlarını hər şeydən üstün tutmağa çağırırıq”, – deyə o qeyd edib.

Pərvanə İmanova Qara və Azov dənizləri, Fars körfəzi və Hörmüz boğazında təhlükəsizlik risklərinin yüksək olduğunu vurğulayıb:

“Dənizçilər səfərə razılıq verməzdən əvvəl mövcud riskləri qiymətləndirməli, aktiv hərbi əməliyyatların aparıldığı ərazilərə səfərlərdən mümkün qədər uzaq durmalıdırlar”.

Agentlik gəmiçilik şirkətlərini və aidiyyəti qurumları da dənizçilərin həyat və sağlamlığını prioritet hesab etməyə, səfərlərdən əvvəl bütün zəruri təhlükəsizlik tədbirlərini görməyə çağırıb.

“Bütün dənizçilərimizi ehtiyatlı olmağa, özlərini və doğmalarını düşünməyə, müharibə zonalarından uzaq durmağa səsləyirik”, – deyə qurumun sözçüsü bildirib.