Arıqlama zamanı protein qəbulu ilə bağlı əsas məqamı mütəxəssis açıqlayıb

"Zülal həqiqətən iştahanı nəzarətdə saxlamağa və məşqlərlə birlikdə yağ yandırmağa kömək edir. Lakin arıqlama əsasən kalori çatışmazlığı ilə müəyyən olunur".

Bunu mediaya müsahibəsində rusiyalı tibb elmləri namizədi Ancelina Süleymanova deyib.

"Zülal daha uzun müddət toxluq hissi yaradır və həzm olunması üçün daha çox enerji tələb edir. Bu da iştahanı nəzarətdə saxlamağa kömək edə bilər. Lakin nəticə etibarilə arıqlama zülalın miqdarı ilə deyil, kalori çatışmazlığı ilə müəyyən olunur. Gündəlik kalori normasından əlavə protein kokteylləri qəbul edilərsə, çəki azalmaq əvəzinə arta bilər", – deyə Süleymanova bildirib.

O vurğulayıb ki, arıqlama zamanı əzələlərin qorunması üçün zülal vacibdir.

"Kifayət qədər zülal qəbulu güc məşqləri ilə birlikdə əzələ toxumasını deyil, yağları itirməyə kömək edir. Lakin "daha çox zülal daha çox əzələ deməkdir" prinsipi yalnız məşq olduqda keçərlidir. Məşq olmadan qəbul edilən artıq zülal əzələyə çevrilməyəcək", – deyə mütəxəssis xəbərdarlıq edib.