At qarışıq yıxıldım çaya... | 15 ildir dərsə atla gedən müəllim

Zaqatalanın Sabunçu kənd məktəbində bədən tərbiyəsindən dərs deyən 35 yaşlı müəllim Rauf Ramazanov ucqar dağ kəndinə gedib-gəlmək üçün saat yarım at sürməli olur.

15 ildir hər gün 7 kilometrlik yolu atla gedən müəllim çayda sel olsa belə, bundan çəkinmir. Çünki nəqliyyat vasitəsi etibarlıdır, 10 illik sadiq dostu onu bu günədək yarı yolda qoymayıb:

“İndiyədək nəqliyyat vasitəsi kimi atdan istifadə edirəm, çünki at belində gedib-gəlmək sağlamlıqdır. Çaylarda nə qədər sel, su olsa belə, istifadə etdiyim nəqliyyat vasitəsi məni heç vaxt yolda qoymayıb, hər yerdən keçə bilir”.