Azərbaycan QHT-si ilk dəfə Kərkükdə musiqi klipi çəkdi - Baku TV

“Vətənpərvərliyin Təbliğinə Dəstək” İctimai Birliyi ilk dəfə Kərkükdə hərbi marşa klip çəkdirib.

Marşı təşkilatın sədri, vətənpərvərlik mahnılarının görkəmli ifaçısı Şəmistan Əlizamanlı ifa edib. Musiqi əsərinin sözləri tanınmış türkman şair Sabah Karaaltına məxsusdur.

Şəmistan Əlizamanlı bildirib ki, bu, Azərbaycanın Kərkükdə ilk klip çəkilişi olmaqla tarixi hadisədir. İfaçı təəssüratlarının çox yüksək olduğunu deyib.

“Türkmanlar soykökü, qanı, dili, dini eyni olan can qardaşlarımızdır. İllərin həsrəti, ayrılığı bizi çox üzüb, indi şükürlər olsun, Azərbaycan və İraq münasibətləri elə səviyyəyə qalxıb ki, türkman qardaşlarımızla əlaqələrimiz getdikcə genişlənir”, – deyə Ş.Əlizamanlı bildirib.

Musiqi əsərinə klip çəkilişləri Kərkükdə olub. “Vətənpərvərliyin Təbliğinə Dəstək” İctimai Birliyi “Türkman marşı”nı bu il ərsəyə gətirib.

Qeyd edək ki, 2026-cı ilin yanvarında Kərkükdə çəkilmiş musiqi klipinin Bakıda təqdimat mərasimi keçiriləcək. Layihənin donoru Azərbaycan Respublikasının QHT-lərə Dövlət Dəstəyi Agentliyidir.