Azərbaycanda 2024-cü ildən bu qanunlar qüvvəyə minir

2024-cü ildə bir neçə qanun layihəsi qüvvəyə minir, demək olar ki, əksər sahələrdə yeniliklər edilib.

İlk olaraq yaşayış minimumu və ehtiyac meyarı dəyişib. Hər ikisi ölkə üzrə 270 manat məbləğində müəyyənləşib.

Digər vacib dəyişikliklərdən biri hərbçilərin pensiya yaşı ilə bağlıdır. Yanvarın 1-dən etibarən hazırlanmasına dövlət tərəfindən zaman və resurs sərf edilmiş hərbi qulluqçuların formalaşmış təcrübəsindən daha uzun müddət istifadə etmək məqsədilə hərbi qulluqçu kimi pensiyaya çıxmaq üçün minimum xidmətkeçmə tələbi 20 təqvim ilindən 25 təqvim ilinə dəyişdirilir.

Qeyd olunan dəyişiklik hərbi qulluqçuların pensiya təminatında hər hansı azalmanı istisna etməklə, bir sıra qurumların hərbi qulluqçularının pensiya təminatında artımı nəzərdə tutur. Belə ki, minimum xidmət müddətinin artırılması ilə yanaşı, həmin dövrə görə qulluq əlavəsi faizi də 50 faizdən 65 faizə qaldırılacaq.

Yanvarın 1-dən "Dövlət satınalmaları haqqında" yeni qanun da qüvvəyə minir. 2024-cü ildə avtomobil almaq istəyənlər üçün də yeniliklər olacaq.

2024-cü il yanvarın 1-dən 2013-cü ilə qədər istehsal olunmuş avtomobillərin idxalına məhdudiyyətlər qoyulacaq. Yeni ildən sərnişindaşıma fəaliyyəti ilə bağlı qanunvericilik mexanizmi də sərtləşdirilir. “Avtomobil nəqliyyatı haqqında” Qanunda və İnzibati Xətalar Məcəlləsində dəyişiklik yanvarın 1-dən qüvvəyə minir.

Qanuna edilən dəyişiklik ölkə ərazisində avtomobil nəqliyyatı ilə sərnişin və yük daşımalarının hüquqi, təşkilati və iqtisadi əsaslarını müəyyən edir.

Yanvarın 1-dən “Vergi Məcəlləsi” nə edilən bir sıra dəyişikliklər qüvvəyə minir. O cümlədən “Nağdsız hesablaşmalar haqqında” Qanuna edilən yeniliyə əsasən, 2024-cü ildən pərakəndə satışla bağlı 4 min, tibbi xidmətlər üzrə isə 5 yüz manatdan çox olan ödənişlər yalnız nağdsız qaydada həyata keçiriləcək.