Bağçada biabırçılıq | Görüntülər gündəmi silkələdi, müdir belə cəzalandırıldı

Abşeron rayonunun Pirəkəşkül qəsəbəsində yerləşən 21 nömrəli dövlət bağçasında uşaqlara antisanitar şəraitdə quru çörək və çay verilməsi, üst-başlarının isə bərbad vəziyyətdə evə qaytarılması ilə bağlı yayılan iddialara Məktəbəqədər və Ümumi Təhsil üzrə Dövlət Agentliyi reaksiya verib.

Abşeron-Xızı Regional Təhsil İdarəsi tərəfindən araşdırma aparılıb və nəticədə, təhsil müəssisəsinin müdiri işdən çıxarılıb.

Qurumdan bildirilib ki, araşdırma nəticəsində vəzifə funksiyalarının icrası zamanı yol verdiyi nöqsanlara görə təhsil müəssisəsinin müdiri Xədicə Vəliyeva ilə bağlanmış əmək müqaviləsinə xitam verilib:

“Bildiririk ki, təhsil müəssisələrində uşaqların düzgün qidalanması, sağlam və təhlükəsiz mühitdə təhsil alması, həmçinin vətəndaşların təhsil müəssisəsinə etimadının artırılması əsas prioritetlərdəndir. Təhsil müəssisələrində hər hansı neqativ halların baş verməsi yolverilməzdir. Bu istiqamətlərdə hər bir müraciət diqqətlə araşdırılır və qanunvericiliyin tələblərinə uyğun tədbirlər görülür”.