Bakı niyə yağışa təslim oldu? - İcra hakimiyyəti başçısından etiraf və təklif

“Mövcud yağış sularının axıdılması sistemi müasir iqlim çağırışlarına tam cavab verə bilmədi”.

Bunu Bakı Şəhər İcra Hakimiyyətinin başçısı Eldar Əzizov aprelin 15-16-da paytaxta yağan güclü leysandan sonrakı mövcud vəziyyəti şərh edərkən deyib.

“Leysan barədə əvvəldən xəbərdarlıq almışdıq. Lakin mövcud yağış sularının axıdılması sistemi müasir iqlim çağırışlarına tam cavab verə bilmədi. Nasos stansiyaları həddindən artıq yükləndi, boru xətləri isə artıq zəruri ötürücülük qabiliyyətini itirdi. Bu isə onu göstərir ki, şəhər infrastrukturu, ilk növbədə kanalizasiya sistemi yeni yanaşmaları zəruri edir”, ‒ deyə Eldar Əzizov bildirib.

Güclü yağıntılar zamanı təhlükəni minimuma endirmək məqsədilə Bakı Şəhər İcra Hakimiyyətinin başçısı müvəqqəti tədbir kimi leysanlar zamanı tunellərə və körpüaltı keçidlərə nəqliyyat vasitələrinin girişinə məhdudiyyət qoyulmasını təklif edib.

İri Şəhərlərin Birləşmiş Su Təchizatı Xidmətindən verilən məlumata əsasən, artıq paytaxtın yağış sularının axıdılması sisteminin müasirləşdirilməsi ilə bağlı zəruri layihənin hazırlanmasına başlanılıb. İlkin qiymətləndirmələrə görə, bu proqramın icrası azı iki il davam edəcək.