Balıqçılara bu tarixə qədər vaxt verildi | Bütün ölkə ərazisində...

Balıqların kürüləmə dövrü ilə əlaqədar olaraq, 1 may 2025-ci il tarixindən etibarən ölkə ərazisindəki bütün su hövzələrində balıq ovuna moratorium tətbiq olunacaq. Bu moratorium, yəni balıq ovu qadağası 1 sentyabr tarixinədək davam edəcək.

Ekologiya və Təbii Sərvətlər Nazirliyi yanında Bioloji Müxtəlifliyin Qorunması Xidmətinin rəis müavini Arzu Babayeva bu müddətdə balıq ovu ilə məşğul olan bütün fiziki və hüquqi şəxsləri mövcud qaydalara əməl etməyə, qadağan olunmuş vaxtlarda və qadağan olunmuş alətlərlə balıq ovlamamaqdan çəkinməyə çağırıb.

Onun sözlərinə görə, sənaye balıq ovu ilə məşğul olan fiziki və hüquqi şəxslər bütün təbii su hövzələrindən ov alətlərini 1 may tarixinədək çıxarmalıdırlar:

“Əks halda, bu alətlərin su hövzələrində saxlanılması qanun pozuntusu hesab ediləcək və həmin şəxslər barəsində qanunvericiliyə uyğun intizam tədbirləri görüləcək. Balıq və digər su bioresurslarının ov qaydalarının pozulmasına, o cümlədən qanunsuz balıq ovuna görə təqsirkar şəxslər Azərbaycan Respublikasının İnzibati Xətalar Məcəlləsinə əsasən məsuliyyət daşıyırlar”.