Banan hansı xəstəliklərin qarşısını ala bilir? | Həkimdən maraqlı açıqlama

Yaşıl bananların müntəzəm istehlakı kolorektal xərçəng riskini əhəmiyyətli dərəcədə azalda bilər. Bu barədə ispan həkimi Uilyam Arias məlumat verib.

Mütəxəssisin sözlərinə görə, yaşıl bananlar rezistent nişasta adlanan xüsusi karbohidrat növü ilə zəngindir. Bu maddə nazik bağırsaqda həzm olunmur və qalın bağırsağa düşərək orada prebiotik kimi fəaliyyət göstərir.

Nəticədə bağırsaq mikroflorası normallaşır və hüceyrələri iltihabdan, həmçinin bədxassəli dəyişikliklərdən qoruyan qısa zəncirli yağ turşularının istehsalı artır.

Uilyam Arias qeyd edib ki, yaşıl bananların faydaları bununla bitmir. Onlar həmçinin xolesterol səviyyəsini azaltmağa kömək edir, ikinci tip şəkərli diabetin inkişafının qarşısını alır və piylənmə ilə mübarizədə effektivdir.

Maraqlıdır ki, yetişmiş bananlar eyni təsirə malik deyil. Mütəxəssis bildirir ki, bir qədər "kal" bananlar tam yetişmiş bananlara nisbətən daha az şəkər və kalori ehtiva edir, eyni zamanda onlarda faydalı qida liflərinin səviyyəsi yüksək qalır.