Bayram süfrəsi neçəyə başa gəlir?

Yeni il bayramına az qalsa da, bazarlarda qələbəlik müşahidə olunmur. Alıcılar bunu bayramqabağı bahalaşma ilə izah edirlər.

Bəs builki Yeni il süfrəsi neçəyə başa gələcək?

Bunu öyrənmək üçün Baku TV ucuzluğu ilə seçilən “Vosmoy bazarı” kimi tanınan “8-ci kilometr bazarı”nda olub.

Yeni il süfrəsi üçün lazım olan əsas məhsullarla bağlı vəziyyət belədir: Dana əti 15 manat, quzu əti 18 manat, qoç əti isə 14 manatdır. Kənd toyuqlarının qiyməti 6-7 manat arasında dəyişir. Farel balığı 15 manat, sazan 6-7 manat, xanı isə 5 manatdır. Satıcıların sözlərinə görə, qiymətlərin 29-30 dekabrda qalxacağı gözlənilir.

Marketlərdəki qiymətlər isə belədir: 1 litrlik qazlı içkilər 90 qəpikdən 1 manat 50 qəpiyədək, təbii şirələr 1 manat 70 qəpikdən 3 manat 20 qəpiyədək, duru yağlar 3 manat 30 qəpikdən 6 manat 90 qəpiyədək, kərə yağı 16 manat 90 qəpikdən 26 manatadək, kolbasanın kilosu 11 manatdan 23 manatadək, mayonez 1 manat 20 qəpikdən 3 manatadək, xama 70 qəpikdən 4 manat 80 qəpiyədək, yaşıl noxud isə 3 manat 30 qəpikdən 5 manatadək qiymətlərə satılır.