BSM Çimnaz Sultavovanın ölümü ilə bağlı məlumat yaydı | İlk dəfə bizə müraciət edəndə...

Bakı Sağlamlıq Mərkəzi aktrisa Çimnaz Sultanovanın xəstəliyi ilə bağlı açıqlama yayıb.

Bildirilib ki, yanvarın 15-i vəfat edən aktrisa Çimnaz Sultanova 4 il ərzində 6 dəfə Bakı Sağlamlıq Mərkəzində tibbi xidmət alıb.

Bakı Sağlamlıq Mərkəzinin Xarici əlaqələr və marketinq şöbəsinin müdiri Günay Kazımovanın sözlərinə görə, aktrisa 2021-ci ilin mart, iyul, 2023-cü ilin iyul, 2024-cü ilin isə aprel, oktyabr və noyabr aylarında stasionar cərrahi müalicədə olub.

Çimnaz Sultanova ilk dəfə tibbi mərkəzə müraciət etdikdə qarın boşluğunun böyük ölçülü törəməsi səbəbindən bağırsaq keçməzliyi diaqnozu ilə qəbul edilib. Ona böyük ölçülü törəmənin kəsilib götürülməsi, bağırsaq keçməzliyinin ləğvi əməliyyatı icra edilib. Patohistoloji müayinə zamanı “Leyomiosarkoma” təsdiq edilib. Xəstə kafi vəziyyətdə evə yazılıb və onkoloqun nəzarətinə göndərilib. Onkoloji mərkəzdə radioterapiya qəbul edib.

Məlumatda qeyd olunub ki, aktrisa növbəti dövrlərdə eyni xəstəliyin qarın boşluğunun müxtəlif orqanlarına metastazı, bağırsaq keçməzliyi, kəskin qarın əlamətləri ilə müraciət edib və cərrahi müalicələr alıb.

Əməliyyatdan sonra hər dəfə onkoloqun nəzarətinə göndərilib. İkinci əməliyyatından sonra da kimyaterapiya qəbul edib.

Çimnaz Sultanova sonuncu müraciətində qalça bağırsağının müsariqəsindən inkişaf edən bağırsaq mənfəzini tam tutan, bağırsaq keçməzliyi yaradan “Qalça bağırsaq müsariqəsinin leyomiosarkoması Grade IV, Qaraciyər, sidik kisəsi, düz bağırsaq, nazik bağırsaq müsariqəsi və peritona metastaslar” diaqnozu ilə stasionar cərrahi müalicə olunub.

“Əməliyyatdan sonra xəstə kafi vəziyyətdə evə yazılıb. Aktrisa özü və xəstəliyi haqqında məlumatların konfidensiallığının qorunmasını tələb edib. Biz rəsmi araşdırmaların aparılması və müvafiq ekspertizanın keçirilməsinə hazırıq”, – deyə Bakı Sağlamlıq Mərkəzinin Xarici əlaqələr və marketinq şöbəsinin müdiri Günay Kazımova bildirib.