Çox qəribə səslənsə də... | Mingəçevirdə bağ sahibinin başına görün nə gəldi

Payız fəsli qışa doğru irəlilədikcə ağaclar donunu dəyişir, yarpaqlar saralıb tökülür. Amma Mingəçevirdə qəribə təbiət hadisəsi yaşanıb.

Belə ki, gilas ağacı yenidən oyanaraq çiçək açıb.

Bağın sahibi Ehtiram Muradov bildirib ki, illər öncə ağacı calaq etdirsə də, gilənar hissəsini budamayıb:

“Bol meyvə gətirən ağacdır. Həm gilənardan, həm də gilasdan faydalanırıq. Payızın soyuq günlərində isə fərqli bir durumun şahidiyik”.

Mingəçevir sakini ağaclara xüsusi qulluq göstərsə də, çiçəkləyən ağacın hər hansı qulluqla əlaqəsinin olmadığını bildirib:

“Bu çiçəkləmə özünəməxsus tərzdə təbiətin hökmü ilə baş verən hadisədir”.

Günbəgün çiçəkləri artan gilas ağacı barəsində mütəxəssislərin fikirləri isə fərqlidir. Onlar sözügedən halın təbiətin anormallığı olduğunu bildiriblər.

“Əgər bir bitki yaz və yay aylarını normal keçirməyibsə, onun potensial imkanı özündə qalır. Uyğun şərait yarananda isə bitkinin daxilindəki potensialı üzə çıxaraq çiçəkləyir. Digər tərəfdən bitki stresə düşdüyündən istəyir ki, daha tez çiçəkləsin və meyvə versin”, – deyə biologiya üzrə fəlsəfə doktoru Asif Mehralıyev qeyd edib.